Zu-leh-sa khamthei/guithei in isum uh leh ihinkhua manpha tah bangjattah ang lamangsah tai? (Reference with a message by Dongzathawng at Zoveng on 18th Febuary 2013 condolence night ) By Khams Zotal "Mite'n silhoi lou ahi chi athei phet un ataimangsan ua akilepsanzel ua, atawpna ah anuisat nalai uhi". Silhoilou ahi chi thei nagehguh a bawl thouthou khu khelna lian tah ahi, tua mabang in mipil misiamte'n agen zel ma bang un "Kheltheilou hindan/tawndan khu khangtouna dallianpen ahi " chin ana gen jel uhi. Ei lah a kikheltheilou gen talou in kikhel sawmna lungtang jonz ineithei sih ua, mite nua a itai vazua uhi. Mite nuisat leh zumpi khop hial in ihinkhua manpha tah te uh isuhsia zel uhi. Khovel a mihing nuamsah tah a piang leh khanglian vang ding ahi. Mihausa ichi te zong gentheina leh hasatna khat chiatnei ding in ka gingta. Sum leh pai hau a Zudawnmi khat insung puidan leh zudawnlou a sumlehpai neikholou insung a zi-leh-tah puidan, ahatsatna/anopna kikhia mama hi. Innneu(talpahte zubu) sung a nikhat a deposit rs.20/- iseng thei bang un, izi sumbawm ahiei, personal bank account ahiei khat a deposit or saving bolthei lei imailam a chimawh/beidong/ poimawh chiang apangna umjolou ding ama? Ngaisut vawi..! Tuathamlou in izi-leh-ta/ inu-leh- pa/i unau-sanggamte leh i innsung uh nuamzaw sah ngei ding a, zong insah/inhangte simawh leh nuisat in i umnon sih ding uhi. Ei atate ding in: Inute un agilsung ua, genthei leh hasahta a hakuoh(9months)vingveng angna gentheipi ua, sisan naisan sua zen a tah(baby) ang nei un, ipankhiat zou ua ahasatna uh hun tading hileh jong ngaidan khat hinalai. Hinan leh nu-le-pa itna khu Sialbang lian a,thupi mama hi. Noitui in angna vaa(feed) ua, aneh tang uh iitlou in ei atate ding khual na’n sep- le-bawl, gentheina kho sahlou a, khanguolte lian tan ang tut uhi. Tua ingkhang let phet ua bang ding a nu-le-pate kizausah a,amittui uh luongsah ding eh? Bang zatvei inu-leh-pate kung a kipahthu igenkha ta uoi leh? Oleh! Nu leh pate ilunggimsah uh eite ding a kipah na’n ang tutzaw ama? Tam hileh vang imailam uh bing ding hi. Adieh in numeite sang in pasallam te’n insung a nu-le-pate ilungkhamsah zawdeu un thei ing. Chilpuoh laitah a lungtang khu damsung a nalungtang ding in gelvot sin, kum leh ha kikhel bang a khangtung chiang a lungsim second 1 leh 2 a kikhel zungzung ahi. Pilvang vailen imailam ding uh khualzaw vai; Igam leh nam kinepna ihi uhi. Insuang Nu leh Pate ding in: Zineithei a insuangthei ding a i umthei leh bang ding a i innsung nuamsah zoulou a, kipahsah zoulou ding eh? Bang ding a izi(wife) toh nita simsial aDRAMA bol zingding eh? Theiding khat chu innsung a tate’n Inu/ Ipa kihoudan, umdan, asia hi in, ahoiloute zousia kila nuam ahi. Sil khat poupou imumun a, izamun seng chiang in thanop na’n hing tut jel hi. Nu-leh-pate’n ithei ding khat chu Innsung( Family) kichi hi tate ding a siamzil kipatna ahi(informal education). Nu leh pate umdante zousia tate’n hing zui ngei ding hi. Tate limlang(mirror) khu nu le pate ahia, Nu-leh- pate limlang khu atate ma ahi. Zu-leh-sa/khamthei-guitheite zia a minua iphalou uh ithei leh bang ding a tawpsanlou a kibuol den ita uoi leh maw? “Zu leh Zou” chi min hing na chiamte ihi uh thei chiatding in ka gingta hi. Na ngaisut khatai...? “Zu-leh-sa/Khamthei-guitheite” mipil/misaim a ineite uh hinkhua leh mihing hinkhua bangzat alamangtai? “Zu-leh-sa/Khamthei-guitheite” zia’n innsung a kitualou na’n bangzat vei ang tut tai? “Zu-leh-sa/Khamthei-guitheite” zia’n inu-ipa/izi-leh- tah/i unau-sanggamte mitui bangzavei iluong sah khatai? “Zu-leh-sa/Khamthei-guitheite” jia’n igamsung uah meithai/tagah bangzat ang tut ei? Chi ei leh ei kidong in kalsuan vai. Hinkhua kichi hi eichou a hilou ahi. Kingaisia’n panna bei kisah vawtsin, Pannanei ding leh mohpuohn lianpi nei ding a pasain in ang siam ahi chi thei zing vai. Munkhat ah ilawsap un zong, mundang a panna ding dang um veve ahi chi manghilsih vai. Gam leh nam lamkai te a ding in: “Zu-leh-sa/Khamthei-guitheite” neh a lamkai kichi hi alamzang sih a, zong zatat na amu sih uhi. Zu sang in Pasian in ilah ua vaihing hawm henlan/ thuneipen in hingpang leh bang ding a mite simmawh leh nam ngiam a ki um ding ama? Lamkai kichi angsiangthou a, thudih a vai ang hawmchiang in anua zuite jonz kithalop in ma atal zungzung hi. Asiam tawp leh piltawp a kigen khat in ahinkhua khamthei-guithei ang neh chiang in min bangmalou in akoi hi. Pilvang vai! “Zu-leh-sa/Khamthei-guitheite” jia’n Zovontawi tuibang luangkhom theilou; “Zu-leh-sa/Khamthei-guitheite”zia’n Tunnu Zolei naubang kap. “Zu-leh-sa/Khamthei-guitheite” zia’n Sianmang in ilah ua vaihawm nuamlou; “Zu-leh-sa/Khamthei-guitheite” jia’n Apieng masapen khu a pieng nukhia bang; “Zu-leh-sa/Khamthei-guitheite” zia’n ipienna Zolei pabang etlawm theilou; “Zu-leh-sa/Khamthei-guitheite” tawpsan a, machiang suonkhom lei I ZOGAM loubang Tulsa, pahbang lun kia ngei ding hi. Nang zolei itlou maw?
CREDIT ...ZO DAILY
No comments:
Post a Comment